हेटौँडाः चालक बद्रि खड्का हेटौँडा–१० स्थित बसपार्कमा काँकडभिट्टाबाट आउँदै गरेको यात्रुबाहक बसको प्रतिक्षमा थिए । इमेज यातायातको ना ५ ख ४०६४ नम्बरको रात्रीबस शनिबार राती करिब ११ः३० बजे बसपार्क आइपुगेपछि बस चालकले उनलाई २८ जना यात्रुसहितको बस जिम्मा लगाए ।
खड्का ठाउँ–ठाउँमा परेको वर्षा छिचोल्दै सदाझैँ करिब ४५ मिनेटमा मनहरी पुगे । सयौं पटक यात्रु लिएर सुरक्षित बसको यात्रा गरेका खड्काले शनिबार राती मनहरी–३ रमनटारमा ट्रकलाई ओभरटेक गर्न खोज्नु नै उनको जीवनको सबैभन्दा ठूलो भुल भयो ।
प्रायः घण्टौं जाममा पर्ने समस्याका कारण उनी छिटो भन्दा छिटो नारायणगढ–मुग्लिन सडकखण्ड पार गर्न चहान्थे । पूर्व–पश्चिम राजमार्ग रमनटारसम्म ५०-६० किमि प्रति घण्टा गतिमा रहेको ना ५ ख ४०६४ नम्बरको बसको गति बढाउन उनले अगाडि रहेको ट्रकलाई ओभरटेक गर्ने प्रयास गरे।
सडकको लेन क्रस गरेपछि उनले बसको स्टेरिङ मोड्न सकेनन् । अन्ततः ओभरटेक गर्ने प्रयास गरेको करिब २० सेकेन्डपछि काठमाडांैबाट गाईघाट जाँदै गरेको ना ५ ख ५०५५ नम्बरको अग्नी यातायातको बससँग ठोक्कियो।
उनले गरेको हठात् निर्णयले अनाहकमा नौ जनाको ज्यान गयो । ३१ जना घाइते भए । बसमा सुतिरहेका यात्रुमध्ये छ जनाले आँखा समेत खोल्न पाएनन् । बाँकी दुई जनाको उपचारको लागि हेटौँडा ल्याउँदै गर्दा बाटोमा र एक जनाको उपचारको क्रममा हेटौँडा–११ स्थित चुरेहिल अस्पतालमा मृत्यु भएको मकवानपुर प्रहरी प्रवक्ता डिएसपी बामदेव गौतमले बताए ।
मृत्यु हुनेहरुमा त्रियुगा नगरपालिका–१० का २५ वर्षीय विनोद कुमार चौधरी, दश वर्षीय मनिरत्न चौधरी, २७ वर्षीय सन्तोष चौधरी, उदयपुर गाईघाटकी तीन वर्षीय बालिका मुस्कान चौधरी रहेकी छिन् ।
दुर्घटनामा परी दुबै बसका सहयोगीको मृत्यु भएको छ । ताप्लेजुङ घर भई झापा तोपगाछी–९ बस्ने अग्नी बसका सहयोगी २९ वर्षीय लक्ष्मीप्रसाद अधिकारी र इमेज बसका सहयोगी बारा निजगढस्थित सिङ्गौलका विशाल धामीको मृत्यु भएको हो ।
ठेगाना नखुलेकी करिब ३३ वर्षीय भिमकुमारी तामाङ (भिमिसा) र अन्य दुई जनाको सनाखत हुन बाँकी रहेको गौतमले जानकारी दिए । मृतक यात्रुमध्ये पाँच जना अग्नी र एक जना इमेज बसका यात्रु रहेका छन् ।
दुर्घटनामा छ जनाको घटनास्थलमै, दुई जनाको उपचारको लागि ल्याउँदै गर्दा बाटोमा र एक जनाको उपचारको क्रममा मृत्यु भएको प्रहरीले जनाएको छ । घाइतेमध्ये १४ जना सामान्य उपचारपछि घर फर्किएको मकवानपुर प्रहरीले जनाएको छ ।
घाइते इमेज बस चालक बद्री खड्का, सप्तरीका भोलेश्वर यादव र अर्का नाम नखुलेका एक व्यक्ति गम्भीर रहेको अस्पतालले जनाएको छ । हेटौँडा–१० स्थित सामुदायीक आँखा अस्पतालमा दुई जनाको आँखाको उपचार भइरहेको र अन्य १५ जनाको चुरेहिल अस्पतालमा उपचार भइरहेको मकवानपुर प्रहरीले जनाएको छ । काँकडभिट्टाबाट काठमाडौँ आउँदै गरेको बसले ट्रकलाई ओभरटेक गरी लेन क्रस गर्ने क्रममा बिपरित दिशाबाट आउँदै गरेको बससँग ठोक्किएर दुर्घटना भएको जिल्ला ट्राफिक प्रहरी प्रमुख कृष्ण थापाले बताए ।
Click Here!
सस्तो भयो ज्यान
त्रियुगा नगरपालिका–१० उदयपुरका मौलाई चौधरी श्रीमती सिंहनीदेवीसँगै कान्छा छोरा विनोद र नाती मनिरत्नलाई लिएर काठमाडौँबाट घर फर्कदै थिए । तर हेटौँडा पुग्न नपाउँदै उनले छोरा र नाती गुमाउनुपर्यो ।
टाउकोमा चोट लागेका मौलाईले चुरेहिल अस्पतालमा उपचार गराईरहँदा पनि हातमा नातीको चप्पल छाडेका थिएनन् । ‘राम्रो गाडी चढ्न नसक्दा छोरा र नाती गुमाएँ, गरिबको ज्यान सस्तो भयो’,उनले रुँदै भने, ‘अब मेरो बंश पनि नरहने भयो ।’
उदयपुर गाइघाटकी पावर्ती चौधरी चुरे हिल अस्पतालको आइसियु कक्षमा उपचार गराइरहेकी छिन् । बसमा छोरी च्यापेर निदाएकी पार्वतीले चुरेहिलमा आएपछि मात्र आँखा खोलिन् ।
आइसियु कक्षमा बेला बेला होस खुल्दा उनी बरबराउँदै भन्छिन्, ‘मेरो खुट्टा पनि चल्दैन, ज्यानभरी घाउ छ । लौन मेरी छोरी खोजिदेऊ ।’ उपचारको क्रममा उनकी तीन वर्षीय छोरी मुस्कानको आइतबार बिहानै अस्पतालमा मृत्यु भयो । तर पार्वतीको अवस्था गम्भीर भएकाले अस्पतालले दिउँसो तीन बजेपछि मात्र उनलाई छोरी बितेको खबर जानकारी गराएको थियो ।
अग्नी बसका यात्रु त्रियुगा, गाईघाटका टिकाराम राउतले ठूलो आवाज आएपछि मात्र दुर्घटना भएको थाहा पाए । ‘सबै यात्रुहरु बसमा निदाइरहेका थिए,एक्कसी ठूलो आवाज आयो र म झ्यालबाट उछिट्एिर सडकमा पछारिन पुगेँँ’, उनले भने, ‘बाहिर चारैतिर उडिरहेको धुलो हटेपछि जताततै शव र घाईतेहरु देखेँ र म पनि बेहोस हुन पुगेछु ।’
स्थानीय टंक मोक्तानले स्थानीय र प्रहरीले तत्कालै घाइतेलाई उपचारको लागि अस्पताल पुर्याएकाले धेरै घाइतेको ज्यान जोगिएको बताए ।
‘मेरो घर भन्दा करिब ५० मिटर तल ठूलो आवाज आएपछि दौडिएर सडकमा पुगेँ, त्यहाँ पुग्दा शव छरिएका र घाइतेहरु छटपटाईरहेका थिए’, घटनाबारे बताउँदै उनले भने, ‘अलि घुमारो सडकका कारण विपरित दिशाबाट आउने सवारी साधन नदेख्दा प्रायः यहाँ दुर्घटना हुने गरेको छ ।’ दुर्घटनास्थल हेटौँडादेखि करिब ३५ किमिको दुरीमा पश्चिममा रहेको छ ।
0 comments:
Post a Comment