झण्डै दुई वर्षअघि मानसिक सन्तुलन गुमाई कुवेतको अल सबा अस्पतालमा उपचार गराइ रहेकी अनिसा बिक आउँदो भदौ १९ गते नेपाल फर्कनुहुने भएको छ ।
सिन्धुपाल्चोकको मार्मिङ ५ की अनिसा भारतको बाटो हुँदै आठ वर्ष अघि घरेलु कामदारका रुपमा कुवेत आउनुभएको थियो । साउदी नागरिकको घरमा काम गर्ने उहाँलाई काम छाडेर हिँडेपछि चोरीको मुद्धा लगाइएको थियो । खाडीका देशहरुमा घरबाट भागेकाहरुलाई चोरी मुद्धा लगाउने गरिएको पाइन्छ । जसका कारण मुद्धा छिनोफानो नभई पीडित कामदार हत्तपत्त देश छाडेर बाहिर जान पाउँदैनन् ।
नेपाली दूतावास कुवेतको पहलमा बिकलाई उहाँकै गाँउ नजिकैको एक महिलाका साथ नेपाल फर्काउन लागिएको हो । उहाँलाई कतार एयरलाइन्सबाट नेपाल पठाउने तयारी भएको दूतावासका प्रतिनिधी सिराज अहमदले जानकारी दिनुभयो । अनिसा र उहाँको साथमा नेपाल फर्कने महिलाको टिकट खर्च दूतावासले व्यहोरेको छ ।
मानसिक सन्तुलन गुमाउनुअघि अनिसा आफूले काम गर्ने घर छाडेर अवैधानिक रुपमा कुवेतमा बस्दै आउनुभएको थियो । अवैधानिक रुपमा बस्दा बिष सेवन गरेपछि अचेत अवस्थामा उहाँलाई अस्पताल पुर्याइएको थियो । सँगै बस्ने सहकर्मीले मानसिक र शारीरिक यातना दिने गरेकोले बिष सेवन गरेको बताइएको छ ।
अवैधानिक भएकै कारण अनिसाको पहिचान नखुलेर १५ महिना अस्पतालमा बेवारिसे अवस्थामा रहनुभएको थियो । गएको फेब्रवरीमा विभिन्न सञ्चारमाध्यममा समाचार आएपछि उहाँका परिवार सम्पर्कमा आएका थिए ।
धेरै वर्षदेखी सम्पर्कविहिन रहेको परिवारले अनिसा कुवेतमा रहेको बारेमा थाहा पाएपछि घर फर्काउन आग्रह गरेका थिए । त्यसपछि भने अनिसालाई नेपाली दूतावास, गैरआवासीय नेपाली संघ लगायतका संघसंस्थाहरुले नेपाल फर्काउन प्रयास गरेका थिए ।
घरमालिक साउदी फर्किसकेकाले अनिसाको मुद्धा छिनोफानो गर्न थप झञ्झटिलो भएको थियो । नेपाली दूतावासले उच्च सरकारी निकायसित छलफल गरेपछि अनिसा नेपाल फर्कन पाउनुहुने भएको हो ।
0 comments:
Post a Comment