कुबेतसिटीः कुबेतका खेलाडीले अन्तर्राष्ट्रिय ओलम्पिक कमिटी (आईओसी) को झन्डामुनि रहेर रियो ओलम्पिक नखेल्ने अडान लिएका छन् । सरकारी हस्तक्षेप भएको भन्दै आईओसीले कुबेतको राष्ट्रिय ओलम्पिक कमिटी र विश्व फुटबल महासंघ (फिफा) ले राष्ट्रिय फुटबल संघमाथि प्रतिबन्ध लगाएका छन् ।
आईओसीको प्रतिबन्धका कारण ओलम्पिकमा सहभागिता जनाउने कुबेतका खेलाडीले आईओसीकी झन्डा बोकेर खेल्नुपर्ने बाध्यता छ ।कुबेतका चर्चित सुटिङ खेलाडी फेहिद अल दिहानीले रियो ओलम्पिकमा आईओसीको झन्डा बोकेर खेल्न अस्वीकार गरेका छन् । ‘म कुबेत आर्मीको बफादार सिपाही हुँ, त्यसैले म ओलम्पिकमा पनि मेरै देशको झन्डा बोकेरै खेल्न चाहन्छु । मलाई आईओसीको झन्डा बोकेर ओलम्पिक खेल्ने मन छैन’, उनले भने । दिहानी कुबेतका लागि ओलम्पिकका पदक जित्ने पहिलो खेलाडी हुन् ।
रियो ओलम्पिकका लागि छनोट भएका दिहानीले सन् २००० को सिड्नी ओलम्पिक र सन् २०१२ को लन्डन ओलम्पिकमा पनि भाग लिएका थिए । उनले ती दुईवटै ओलम्पिकमा कांस्य पदक जितेका थिए । अन्तिम समयमा कुबेत सरकार र आईओसीबीच कुराकानी भइरहे पनि दिहानीसहित कुबेतका अन्य सातजना खेलाडीले आईओसीको झन्डामुनि खेल्न अस्वीकार गरेका छन् ।
ओलम्पिकका लागि छनोट भएका कुबेतका खेलाडीले ओलम्पिकमा सबैभन्दा ठूलो कुरा भनेको आफ्नो देश र देशको झन्डा बोक्नु नै रहेको धारणा व्यक्त गरेका छन् । कुबेतका खेलाडीहरूले आफ्नो देशको झन्डा बोकेर खेल्न नपाए आफूहरूका लागि ओलम्पिक सहभागिताको कुनै अर्थ नहुने पनि बताएका छन् । कुबेत सरकारले अनावश्यक हस्तक्षेप गरेको भन्दै आईओसीले गत जुनमा पुनः कुबेतलाई प्रतिबन्ध गरेको थियो । कुबेतलाई आईओसीले प्रतिबन्ध लगाएको यो तेस्रो पटक हो । यसअघि सन् २००७ मा आईओसीले पहिलोपटक कुबेतमाथि प्रतिबन्ध लगाएको थियो ।
कुबेत सरकारले भने आईओसीको प्रतिबन्धका कारण कुबेतलाई ठूलो क्षति भएको जनाउदै आईओसीसँग एक अरब अमेरिकी डलरको क्षतिपूर्ति माग गर्दै कानुनी लडाइँ लड्ने जनाएको छ । कुबेतका युवा तथा सूचनामन्त्री शेख सलमान अल हुमोद अल सबाहले कुबेतमाथिको निलम्बन अन्यायपूर्ण भएकाले ‘कोर्ट अफ आर्बिट्रेसन फर स्पोर्टस' मा पुनरावेदन गरिने बताए । कुबेत सरकारले अहिले ओलम्पिकमा खेलाडीले आफ्नै देशको झन्डा बोकेर खेल्न पाउनुपर्ने माग संयुक्त राष्ट्रसंघमार्फत पनि अघि बढाउँदै आएको छ ।
0 comments:
Post a Comment